O le isi tamaitai faipule a le Greens, Darleen Tana ua faamalolo mo le taimi nei ona o tuuaiga, i le iai o lona sootaga ma le faapologaina o tagata faigaluega mai atunuu i fafo i le kamupani a lona toalua.
O Tana, ua toatolu iai faipule a le Greens i lalo ane ma le tausaga e feagai ma faafitauli, i le mulimuli atu ai lea i tulagavae o le isi tamaitai faipule, Elizaberth Kerekere, sa faamavae ma le pati i le tausaga talu ai, ona o tuuaiga i le faapalopalo (bullying).
Talu ai nei o le tamaitai faipule Golriz Ghahraman, sa faamavae ina ua aliae ane tuuaiga i le gaoi.
O tamaitai soātaitai e toalua a le Green, Marama Davidson ma Chloe Swarbrick sa feagai ma aufailipoti i le taeao nei e tali ai i nei tuuaiga.
Sa faailoa ai e Davidson i le Leitio a Niu Sila, o nei vevesi ua faailoa ai le fetaia’i o le pati ma taimi faigata.
Ae fai mai Swarbrick, na ia logoina le leitio a le Newstalk ZB, o ni tuuaiga e matuai matuia.
I le faamatalaga mai ia Davidson ma Swarbrick sa ta’ua ai, o Tana sa faamalolo i le aso ananafi, talu ai tuuaiga sa lāgā i se tulaga feteenai e iai ma ona tiute sooupu faapisinisi laiti (conflict of interest).
O tuuaiga sa muamua aliali ane i le aso muamua o Fepuari, ina ua logoina e Tana ia le pati e faapea, e iai se faitioga ua faatoai i le Pulega o Sootaga o Galuega – Employment Relations Authority – e se tagata faigaluega i le kamupani a lona toalua, le E-Bikes NZ.
