O lea ua agai mai i Samoa le malaga faataupou a le vaaleoleo fou o le Nafanua III, ina ua mae’a fausia ma tauaao aloaia i le Malo o Samoa, aemaise ai le tasi o vaega tāua ua mae’a ma aoaoga a le auvaa sa malaga atu i Ausetalia mo ia a’oa’oga ma tapena ai le folau mai i lo tatou atunuu ma le vaaleoleo fou o le meaalofa na faatupe e le Malo o Ausetalia.
Ua faailoa i upega tafailagi a le Matagaluega o leoleo falepuipui ma le toe fuataina, o le vaiaso nei ua malaga mai ai le vaa ma ua faamoemoe e taunuu i lbe uafu tele i Apia i le aso 20 o le masina fou o Ianuari o le tausaga 2024.
O le tāua o lea foai a Ausetalia e pei ona aofia ai ma nisi o atunuu o le Pasefika o loo iai o latou vaaleoleo mai le polokalame o le puipuiga a lea Malo, o le leoina o ogasami faatulafonoina ma mataitu ni gaioiga solitulafono i le fagotaina o ia ogasami.
O le tausaga e 1988 na uluai tauaao ai e Samoa le vaaleoleo muamua, ae o Aokuso o le tausaga e 2019 na tauaao ai le sui o le Nafanua muamua le vaaleoleo o le Nafanua 2.
E lei atoa se 3 tausaga o le vaaleoleo lea ae toe faafoi ua faaletonu ina ua pa’ulia ma faaleagaina ai lalo o le vaa.
O lea ua iai se isi vaaleoleo o se foai a le Malo o Iapani, ma ua lua ai vaa leoleo o le a iai i le vaaiga a le Matagaluega o leoleo, falepuipui ma le toe fuataina.
