O le feiloaiga na faia e le mamalu o Samoa ma le ta’ita’i o le vaega faaupufai a le ACT, Hon David Seymour, i le Maota o Samoa i Magele, le Aso Lulu, aso 3 Iulai, na faailoa ai e le fetalaiga a Teleiai Edwin Puni, le telefoni ane a le ta’ita’i o le NZ First, Vaovasamanaia Hon Winston Peters, ina ia faamauina le Aso Faraile, 30 o Aokuso, o le a oo mai ai ina ia feiloai ma le mamalu o Samoa e faatalanoa le mataupu lava lenei i le toe faafoisia o sitiseni o tagata Samoa.
Ae o le tala e sili atu ona fiafia ma lagona ai le taufai pati o le aofia atoa na iai i lea aso, ina ua toe faamautinoa mai e Teleiai le feau taumomoli mai ia Peters, e lē na o ia pe na o latou ta’ita’i e oo mai, ae o le latou vaega faaupufai atoa o le a masii mai e feiloai ia Samoa.
O i’uleo nei ua momoli maia lagona fiatai ua atili faalototele ai ia Samoa, e peiseai ua tau vavala mai ata o taulelei e ono fulisia lava le lagolago a sui o le Palemene i le mau o loo finau atu ai Samoa e tauala atu i le pili taufaaofi a le sui faipule o le Green Party, le susuga Teanau Tuiono.
O le a tālia pea le faagasologa o lenei mataupu, ma o loo faasolo pea i le taimi nei le faitauina ma le faalogologo o le komiti filifilia i finagalo faaalia uma o i latou sa tuuina atu poo latou submissions i lenei mataupu.
