Ua maua ai ma le tali o le tele o masaloga sa iai e faatatau i le alii taalo o Sam Whitelock ina ua faailoa i lipoti lona folafola o lona malolo litaea mai le taaloga aemaise o lana konekarate o iai nei ma se kalapu lakapi a Farani.

O Sam Whitelock se tasi iloga o le All Blacks na faasee ese ma le ‘au a le atunuu i le mae’a o le Ipu o le Lalolagi i le tausaga talu ai i Farani ma o ia le tama taalo o le All Blacks e aupito tele ana taaloga faavaomalo.

Na sainia ai lana konekarate i le kalapu a Farani o Pau, o loo taaalo ai ma lona uso o Luke Whitelock.

Fai mai a ia i le faatalanoaga ma le Newshub ua ia manatu e lē o se faaiuga faigofie ua ia faia peitai o se tulaga talafeagai lea mo ia aemaise lona toalua ma si ana fanau e toatolu.

Fai mai le faiaoga o iai nei o le All Blacks, Scott Robertson, o Sam o se tama taaalo ua tele lona sao i le lakapi faapea foi i le All Blacks, e tulaga ese ana tapenaga faalemafaufau aemaise i le malosi o le tino ma o lona agaga finafinau e faamauina faatasi ai o ia ma isi iloga i le taaloga i le vaega aupito maualuga o le taaloga.

Puna o Faamatalaga: https://www.newshub.co.nz/home/sport/2024/04/rugby-all-blacks-icon-sam-whitelock-announces-retirement-ends-comeback-speculation.html