O lea ua faailoa e le ta’ita’i o le Itu Agai le susuga Tuilaepa L Sailele Malielegaoi, lona faafetaia o le faipule ia Teanau Tuiono, i le finau e toe faafoi le faamanuiaga o le tagatānuu, poo le sitiseni o tagata Samoa na aveesea i le tulafono a Niu Sila na pasia i le tausaga e 1982, i latou ia ma soifua mai i le va o le masin o Me o le tausaga e 1924 ma Ianuari o le tausaga e 1949.
Peitai i le feiloa’iga a le ta’ita’i o le Itu Agai ma tusitala i le Aso Tofi o le vaiaso nei, na ia folafola ai afai ae toe tula’i lana pati faaupufai i le isi faigapalota tele i le faatautaiga o le malo, o le isi lea o taumafaiga o le a finau ai, ia aofia ai ma fanau a i latou ua agavaa i le sitiseni Niu Sila.
Faaalia e Tuilaepa e lē o toe to’atele nisi o tupulaga o loo lavea i tausaga o le sitiseni Niu Sila o loo soifua pea.
Se finagalo o le susuga Tuilaepa L Sailele Malielegaoi le ta’ita’i o le Itu Agai i lana feiloa’iga masani ma tusitala i vaiaso ta’itasi.
O le Aso Lua o le vaiaso a sau e pei ona faailoa i lipoti ua faamoemoe e amata tatala ai le avanoa e talosaga ai tagata Samoa e agavaa i le sitiseni Niu Sila.
A fua i le masina o Me o le tausaga e 1924 faasolo mai i le masina o Ianuari o le tausaga e 1949 lea o loo agavaa ai tagata Samoa e maua le sitiseni poo le tulaga tagatanuu o Niu Sila, afai o iai pea nisi na soifua mai le 1924 ia Me o lea tausaga o lona uiga ua aulia le selau tausaga o le matua o le soifua.
E iai le talitonuga o loo iai nisi o loo soifua mai pea ua silia i le 80 ma le 90 tausaga o le soifua.
Ae o ē uma na soifua mai ia Ianuari o le tausaga e 1949 lea e muta ai le faamanuiaga sitiseni Niu Sila, e oo mai ia Ianuari o le tausaga nei pe afai o soifua pea, ua aulia e i latou le 75 tausaga o le soifua.
