E iai lipoti ua faailoa i le vaiaso nei ua  ta’ua ai e tele kamupani e lē gata i Niu Sila ae o Ausetalia foi o loo faatalitali pea i le taimi nei mo totogi o a latou auaunaga na faia i le taimi o le Ipu o le Lalolagi a le FIFA lea e lei leva nei ona mae’a atu i le itupa o tamaitai.

Sa faia se suesuega a le One News i le mataupu lea aemaise le kamupani faavaomalo le CSM Live lea e faapea ua iloa nei e lei totogia lava pili o nisi kamupani sa faia signs ma faailo i le taimi o taaloga.

Fai mai sa iai le konekarate a le kamupani lea ma le FIFA ma o latou sa feagai ma le vaega o faalauiloaga o taaloga ae fā pisinisi ua o latou faailoa i le One News e oo mai i le taimi nei o loo finau pea mo a latou peimeni.

Ua faailoa e le tamaitai pule o le Otago Grand format Print o Fiona Hunter i Dunedin o loo faatali pea mo lana pili e silia ma le 200 afe.

O loo ta’ua i le lipoti ua fuafua kamupani nei e fai sa latou su tuufaatasi agai i le CSM Live auā e lē o tali ane foi i imeli ma fesootaiga o loo taumafai atu iai.

Na ta’ua e le One News o sina faamatalaga puupuu mai le kamupani lea a le CSM ua ta’ua ai o loo galulue nei i le foiaina o le mataupu lea i invoice a suppliers.

Fai mai le FIFA e lē o iloa e latou o loo iai ni faatuai i le totogiina o nai kamupani ia ma o le mataupu la o loo taatia lava i le CSM.

Ua faailoa foi e le CSM ua mae’a ona totogi ane latou e le FIFA ma e lē o le FIFA ua mafua ai le faatuai i peimeni ae o latou lava.