O le tāga fa’i i lo latou aiga i Fasitoouta ia Mati o le tausaga nei, i se tapenaga o le maliu o lo latou aiga, ae lavea ai le taavale ma maliu ai lona uso 19 tausaga le matua.

O Tovi’o o se taulealea 20 tausaga na ia aveina se taavale na alu ai le tāga fa’i ae na saoasaoa tele ma feto’ai ai ma se laau o le ‘ulu i se vaega o le alatele taloto i ga’uta o Fasitoouta. O le uso o Tovi’o ua maliu na vaetama e se aiga i Nofoalii ma o le aiga foi lea na ola a’e ai. I le fofogaina o le faasalaga a le faamasinoga na faailoa ai e leoleo o lē ua molia ma faasalaina sa ia faafoe le taavale na lavea ae leai se laisene avetaavale. Na ioe i le moliaga o le avetaavale faatamala ua oo ai le maliu i lona uso moni.

O se tulaga tāua lea i le silasila a le faamasinoga i le faia o lana faai’uga, aemaise sa fesoasoani i lona uso ina ua tupu le faalavelave. Sa faatāua foi i le faai’uga le faatoesega na faia e le aiga o Tovi’o i le aiga sa vaetamaina lona uso. Sa talosaga lana loia i se faasalaga salatupe ae lē o le falepuipui peitai o le silasila a le faamasinoga e talafeagai se faasalaga i le falepuipui ma amata ai le fua o le faasalaga i le tolu tausaga.

Na toesea le tele o masina ma faasala ai Tovi’o i le 7 masina i le moliaga o le ave taavale faatamala ua maliu ai se tagata, ae 3 masina mo le moliaga o le ave taavale faatamala na faamanu’alia ai se isi alii talavou sa malaga ai i le taavale. E tuli faatasi uma nei faasalaga i totonu o le fitu masina.