Ua faalauiloa aloa’ia e le Palemia o Fiti, Sitiveni Rabuka le Foreign Policy White Paper a lona atunuu ma le faamatalaga o le a fesoasoani lea i le atunuu i lu’itau mai nisi o faiga faavae faigata mai atunuu i fafo.
Fai mai Rabuka i tala mai le Pasefika, o le pepa lea ua faalauiloa nei e faamatala ai le vaai a Fiti ia te ia lava ma pe faapefea ona ofoina atu o ia i le komiuniti faavaomalo.
O loo faatulaga ane ai faiga faavae a le Malo i tulaga tau le va i fafo e pei o le una’ia o le faalauiloa o le Ocean of Peace, o se tasi lea o sao tāua o Fiti i le saogalemu ma le filemu o ona tuaoi aemaise i le Itulagi o le Pasefika le Indo Pacific Region.
Na ta’ua e Rabuka o le pepa lea e faamautū ai le tulaga tonu o Fiti ma faamautū ai, o mea uma o loo faatino i faiga faavae faavaomalo, e tatau lava ona muamua faailoa i le aiga faa-Pasefika.
O lona uiga o se pepa ua faatulaga ane ai faiga faavae a Fiti i tulaga faavaomalo aemaise foi i lona lava lotoifale.
O Vanuatu foi le isi atunuu ua faalauiloa lana ulua’i faiga faavae faavaomalo ma e 52 itulau o lea pepa ua faatulaga ane ai foi vaega tāua e fā o loo ave iai le faatāua a lea foi atunuu auā le aga’i i luma.
O loo ta’ua i le lipoti finagalo faaalia o nisi e tele le tomai i mataupu tau upufai o malo, fai mai o ni suiga o le a faia e Trump i faiga faavae faavaomalo a Amerika e ono iai ni aafiaga i le Pasefika aemaise i le itu tau fefaataua’iga, puipuiga ma mataupu faapolokiki.
Puna o Faamatalaga: https://www.rnz.co.nz/international/pacific-news/534079/pacific-leaders-outline-foreign-policy-priorities-amid-geopolitical-and-climate-crises
