O le aso muamua o le Komesina fou, le anti corruption commissioner a Fiti i lona tofiga ae pu’eina ai e leoleo.
O le amataga o Setema na faalauiloa ai e le malo o Fiti le filifilia o Barbara Malimali i le tofiga lea o le faauluuluga o le Fiji Independent Commission Against Corruption ae peitai o lipoti a le RNZ ua ta’ua ai na toe fesiligia lava e leoleo ina ua pu’eina i lalo o le faatonuga mai le Sui Komesina o Francis Puleiwai.
Ua feavea’i solo i faatalanoaga le aafia o nei tofiga i faiga faapolokiki ma ua folafola ai e le Palemia, Sitiveni Rabuka le faia iai o se komisi su’esu’e.
Fai mai Puleiwai le Sui Komesina o le totino lea, sa lē tatau lava ona tofia Malimali i le tulaga lea a o faia iai su’esu’ega i le isi foi tofiga sa iai muamua o le ta’ita’ifono o le Komisi o faigapalota.
Fai mai Puleiwai e tatau ona silafia e tagata lautele o lea tofiga na faia i se tulaga faatopetope.
O le taimi nei ua faamavae foi Puleiwai mai le tofiga o le Sui Komesina o faalapotopotoga lea ina ua mae’a ona pu’eina Malimali ma ua ta’ua ua aga’i atu nei i Ausetalia.
O le tali a le Fiji Independent Commission Against Corruption i tuua’iga ia mai ia Puleiwai ua ta’ua ai e le’i iai se faalavelavegia o ana galuega i gaioiga mai le faigamalo o iai nei poo se isi pati faapolokiki ma o loo usita’ia tulaga uma tau le tulafono.
O le faalapotopotoga na faatūina i le 2007 i lalo o le ta’ita’iga a le Palemia sa iai o Frank Bainimarama ae fai mai nisi e le’i iloga lava ona tula’i mai i se tulaga lelei le faatinoina o ana matafaioi.
O le Loia Sili a Fiti na faailoa lona lē taliaina o le pu’eina o Malimali, fai mai a ia i le ABC, ua mafua ona aga’i osofa’iga a Puleiwai ia Malimali ona sa talosaga i le avanoa lea ae na te le’i mauaina.
Puna o Faamatalaga: https://www.rnz.co.nz/international/pacific-news/530236/why-fiji-s-new-anti-corruption-commissioner-was-arrested-on-her-first-day-in-the-job
