Ua suia le filifiliga a le susuga Vaotuua Michael Toevai na te lē toe lagolagoina se vaega faaupufai ona o tu ma aga faapatī ae avea loa ma sui tutoatasi i le palota laititi a Sagaga No.2 ina ia finauina ai lana mau o le soloia lea o le tulafono o le resitalaina o fanua faaleaganuu.
O Vaotuua o se tasi o sui tauva mai le afioaga o Afega ma ua to’a ono ia te ia sui tauva o Sagaga No.2 ma e iai lona talitonuga a faamanuiaina i le nofoa a lona itumalo o le a finau e tauave le mau a le Faalapotopotoga o el SSIG ia soloia le tulafono o le LTRA sa tapisa ai faalauiloa a le Faalapotopotoga a’o lumanai le palota tele ia Aperila.
O se faatalatalanoaga a lea sui ma sooupu o le Radio Samoa ma ia faaalia ai ua taunuu lona manao ia suia se faigamalo e taitaia le atunuu e pei ona tulai ai nei le vaega faaupufai a le Faatuatua i le Atua Samoa ua Tasi. Peitai o lona tutoatasi o le a faaauau ai lana mau na mafua ai ona ia tuua lona aiga ma ona alo i atunuu i fafo ae taliu atu i Samoa i le tausaga e 2017.
Taua e lea sui “E iai foi vaega faaupufai ta te faaeteete iai ona e noanoatia ai foi lo’u talitonuga to’a tasi aemaise lava le matou finau mai lalo le SSIG o loo faataua pea e a’u le finau a le SSIG mai nei tausaga i tulaga lava Ia i itu tau eleele o tatou.
Ua taunuu o’u moomooga muamua na ala ai ona o’u sau i Samoa oute nofo ma o’u finau ma lo’u talitonuga ina Ia sui le faigamalo, lona lua o tatou eleele faaleaganuuu, o le mafuaaga lena ua ala ai ona o’u tutoatasi i le taimi nei”.
Taua foi e Vaotuua na iai lona lagona e tauva i lalo o le faamalu a le FAST ona e fetaui ma lona manaoga peitai ua lē maua e le FAST le 2/3 o le Palemene e mafai ai ona fesoasoani atu i le manaoga o le SSIG.
