I le mae’a o le aso lona lima o Taaloga a Malo o le Taupulega o loo faagasolo i Birmingham i Peretania, o lea ua faamauina le uluai pine auro ma le matati’a ua faatū ai e se tasi o tamafanau a le atunuu i taaloga sisii u’amea mamafa le susuga Don Opeloge.
I le sii i le mamafa e 96 kilokalama ua ia faatūina ai le matati’a i le aofaiga o lana sii e 381kilokalama. O le tasi o tamafanau i le taaloga lava lea le susuga Vaipapa Nevo Ioane na manumalo i le uluai pine siliva a Samoa i le sii o le 67kilokalama. O le lipoti lata mai i le pulega o le au masii a Samoa ua faailoa ai o le taaloga o faipelega ua sao atu ai le alii fusu o Marion Ah Tong i quarterfinals ina ua manumalo i le la fusuaga ma se alii fusu mai le atunuu o Sri Lanka. O le Aso Tofi lenei o le a faataunuuina ai lana fusuaga i quarterfinals.
O le taaloga o le togiina o le ipu salafalafa le discuss ua sao atu le sui o Samoa i lea taaloga o Alex Rose i le sailiga o pine auro, siliva ma le apamemea, ina ua manuia lana togi i le taamilosaga e saili ai i latou mo le siamupini i le vaega o alii. Na tulaga 4 lana togi mulimuli e 63 tesimale 20 mita le mamao. O le afiafi nanei o le a faia ai lea sailiga siamupini e iloa ai i latou o le a manumalo i pine.
O le taaloga o le Judo ua lē manuia le taumafai o le alii o Will Tai Tin sa fai ma sui o Samoa i lea taaloga, e faapena foi i taaloga afeleti taufetuli i le selau mita a alii e ta’itolu tama o le tatou ‘au sa tausinio ai ua lē faamanuiaina.
O Kelvin Savaiinaea Masoe sa tausinio i le vaega o le oso mamao le long jump i taaloga afeleti ua lē manuia foi i le sailiga o le siamupini e maua ai pine, peitai o le a taalo o ia i taaloga afeleti i le moliga fu’a ta’ito’afā e selau mita. O le tamaitai o Nuuausala Tuilefano ua faamautu lona tulaga i le sailiga siamupini o le taaloga o le togiina o le pulu mamafa le shot put, ae o le tatou ‘au i tuuga aau ua lē manuia.
