Ua i luma nei o le faamasinoga sili a le atunuu se mataupu tau i le totogi o le inisiua a le kamupani lauiloa a Chan Mow poo Amau o loo silafia tele ai, e faasino i le nofoaga o le oloa siiatoa a le kamupani na faatama’ia uma i le malaia poo le afi i le tausaga e 2016.
E silia i le 9 miliona tala le totogi o le inisiua o meatotino uma a le kamupani sa tatau ona totogi iai e le kamupani inisiua o le Progessive Insurance, peitai e na’o se vaega ua mae’a ona totogi ae oo mai ia Setema o le tausaga na tea nei, ua faato’ai e le kamupani inisiua se tapenaga e tapunia ai lana auaunaga ae toe 4 ma ona tupu miliona e lei mae’a totogiina i le kamupani na aafia i le malaia ana meatotino.
O lea ua toe faaulu ai e le kamupani se talosaga i le faamasinoga e teuteu ai lana talosaga autu ua faaopoopo ai le isi vaegatupe e tasi tesimale lua miliona i le 4 ma ona tupu miliona o le inisiua e lei mae’a ona totogi. O le masina nei e valaau ai lea talosaga teuteu poo le amended statement of claim mo le suesueina pe talia ona o loo tetee iai le kamupani inisiua.
O le tasi vaega o le talosaga teuteu ua finau ai le kamupani a Chan Mow ua lē tausisia e le kamupani inisiua le latou maliega e togitogi atu le vaega o le inisiua na totoe, ae ua liliu le kamupani inisiua ma saili se tagata mai fafo e na te tauaveina galuega o le tapunia o le Progressive Insurance e aunoa ma le logoina atu o lea fuafuaga aemaise o le logoina o tagata sa faaaogāina lea pisinisi tau inisiua i totonu o Samoa.
