Ua faailoa finagalo o le au tufameli e faapea o le fuafuaga a le NZ Post ua iai nei e suia latou e ala i le faaaogāina o couriers, fai mai tufameli o le a faatuai ai le auaunaga. Lipotia i le RNZ i le asō o loo iai le fuafuaga a le kamupani e vāea tagata faigaluega e 700, o le au tufameli i totonu o le isi lima tausaga o lumanai ma pasi atu a latou tiute i ave courier o le a tuuina iai konekarate.
Ua ta’ua i le lipoti se faamatalaga mai le NZ Post i le tausaga na tea nei o le a faataitai ai nisi o mea ina ia faatulaga ai poo ā tonu vaega e faaleleia ai le auaunaga.
Na o latou ta’ua foi o le 20 tausaga talu ai sa talafo ai e tagata Niu Sila le silia ma le tasi le piliona o meli i le tausaga peitai ua matuai faaitiitia lea aofaiga i le taimi nei i le na o le 220 miliona i le tausaga.
Faailoa se finagalo o le Iuni o loo tulai mo le au tufameli e faapea o le faamalosia o le au ave courier e feaveai tusi poo meli ia latou vans e atili faatuai ai le auaunaga ma sili atu ona vave ai le uilaafi e masani ona faaaogā e le au tufameli ma e tuai atu pe a faaaogā le van auā e tau sailia lava se paka.
Ta’ua foi e le sui o le Iuni o le suia o tufameli i tagata ia o le a faakonekarate, o loo aafia ai le tulafono o le State Owned Enterprises Act ma ua tuuina atu sa latou proposal i le NZ Post ma o loo faatalia iai se tali.
