O le afioga i le faletua ia Tuifaasisina Lanuola e mai le afioaga o Vaigaga ma Manono, ae o lona aiga e mai le afioaga o Alamagoto.
E 9 tausaga o galue i Samoa i le matagaluega o leoleo, ma sa ia umia le taai lua i lea matagaluega, ae malaga mai i Niu Sila nei auā le sailia o le manuia o le fanau.
Sa tautua i le kalapu soka a le latou aiga i Alamagoto o le Adidas FC, o se tasi o kalapu soka i Samoa ua savali i le 40 tausaga talu ona faavae mai, ae sa tautua foi i le kalapu soka a le atunuu i Samoa.
I lona soifua taalo sa fiafia e taalo i le soka i lona olaga talavou a o aoga seia oo lava i aoga maualuluga o fiafia lava e fai lana taleni, mai le tausaga 2011 seia oo i le tausaga 2013.
O lona tupuaga o se aiga e fiafia tele ona uso ma tuagane i soo se taaloga ma o le ala foi lea o lona fiafia e taalo ona o le taleni o loo auai uma iai lona aiga.
O le aumau ai o le afioga ia Tuifaasisina ma lona aiga i Niu Sila nei, ua mafai ai ona filifilia o ia e fai ma faiaoga o le ausoka o le kalapu a le Mangere United AFC, mai le 8 tausaga le matutua o le fanau seia oo lava i luga i ‘au a tagata matutua.
Na ta’ua e le afioga ia Tuifaasisina Lanuola Mulipola e lei iai se manatu poo se lagona e fai o ia ma faiaoga i lea kalapu peitai o le la alo o loo taalo ai i totonu o lea kalapu sa mafai ona auai atu iai, ma o le taimi lea sa mafai ona maua se latou fesootaiga ma lea kalapu mo le fia maua o lana fesoasoani ina ia mafai ona faasoa mai lona malamalama auā le atinaeina o lea kalapu i totonu o Aukilani.
Ma o se avanoa o loo fiafia iai auā o loo toatele alo ma fanau o le atunuu e fiafia i le taaloga lenei o le soka.
Ae iai foi lona talitonuga o se avanoa lelei o le a mafai ai ona fesoasoani ma faasoa ai i alo ma fanau o le atunuu ina ia uunaia e fai le taleni auā o le isi manuia lea mo le aiga.
