I le mae’a ona faasalalau nisi e talosaga i le avanoa o se tasi e faauluulu iai se tasi o auaunaga fou a le Malo ua faatūina, le Pulega lea o Fefaataua’iga o Oloa a Samoa poo le Samoa Export Authority, o le vaiaso nei i le fono masani a le Kapeneta na faamautu ai le filifiliga o se Ofisa Sili muamua o lea pulega, e pei ona pale mai ai se tasi o alo ma tamafanau a Samoa le afioga Pouli Dr Keneti Faulalo.
O ia o se alo e faasino i le aiga Sā Matiu i Utualii, ma o se tamalii ua umia tomai ma agavaa faapitoa i mataupu tau atina’e faavaomalo, aemaise o le taula’i o lana vaai i mataupu tau atina’e faaauau mo atunuu tau atia’e i le Pasefika ma le lalolagi atoa.
O se tamalii foi sa avea ma Konesale i Samoa ma atunuu e mamao faapea ai ma nisi o faalapotopotoga faavaomalo.
E lava foi lona silafia i le itu tau atina’e faaauau ma poloketi faatino mo faatoaga, faigafaiva, lafumanu, ma taumafa.
Sa a’oa’oina i le Kolisi o Samoa, o le kolisi o New Plymouth Boys i Niu Sila, faapea le Iunivesite o Cantebury sa faamanuaiaina ai i faailoga o le Bachelor of Science ma le Master of Science with Honors.
Ua faailoa i se pepa o faamatalaga mai le ofisa sooupu a le Malo, o le faatūina o le Pulega fou mo Fefaataua’iga o Oloa a Samoa, o se silasila mamao a le Malo ina ia unaia le lava o avanoa faavaomalo mo fefaataua’iga o oloa a le atunuu e auina atu mai Samoa mo isi atunuu o le lalolagi.
