Ua soloa’i ane nei le tamaitai o Te Puhi Ariki Ngawai Hono I Te Po Paki, i le nofoalii e avea ma Faaao poo le Tupu Tamaitai o Māoli, ina ua mavae ai le tuumalo o lona tuaa, le Tupu o Māoli o Kiingi Tuheitia.
O Te Puhi Ariki Ngawai Hono I Te Po Paki, o le ui’i o le fanauga ae na o ia le alo tamaitai poo le afafine o Kiingi Tuheitia, ae o lea ua filifilia e avea ma Tupu o le Kiingitanga.
O Ngawai Hono i te Po Paki o le lona valu ai lea o Tupu o Māoli ae o ia se Tupu Tamaitai lona lua o Māoli ua filifilia, e pei ona muamua seei ai lenei tofiga le tuaa tina o lona tamā o Kiingi Tuheitia, Te Atairangikaahu, lea na tuumalo i le 2006.
O Ngawai Hono i te Po Paki ua 27 tausaga o lona soifua, ma ua lona lua ia te ia Tupu pito laiti ua filifilia o Māoli.
E to’alua alo alii o Kiingi Tuheitia, o Te Ariki Tamaaroa Whatumoana Paki ma Te Ariki Turuki Korotangi Paki, ae o lea ua faia le filifiliga i lo la tuafafine.
O le atalii ulumatua, Whatumoana Paki sa galue lava faatasi ma lona tamā i le amataga o le nofoaiga a le Tupu, peitai o lona alo tamaitai lea na tele ina vaaia i vaitaimi lata mai nei o auai faatasi atu ma lona tuaa i le tele o meafai aloaia.
O lona atalii laitiiti, Korotangi, o loo faia sana pisinisi Tā Moko, e ta’ua o le Korotangi Art.
O loo lipotia mai i le RNZ, o le tausaga e 2016, na foa’i atu ai e Korotangi lona fatuga’o (tulou) ina ia soifua ai si ona tuaa, Kiingi Tuheitia.
O le Tekau maa-rua – le to’a 12 – o le Kiingitanga e fai a’e i sui e to’a 12 mai iwi i vaega uma o le atunuu, o i latou na ua iai le tofiga e filifilia se tupu fou, faatasi ai ma isi rangatira, ta’i mai isi uma vaega o le atunuu, ma o le pulega lenei sa faia le filifiliga lea ua oo iai mo le alo tamaitai e avea ma Tupu Tamaitai.
E lē o mailoa pe sa faaalia se finagalo o le Tupu a o soifua mai mo se tasi na ia finagalo e tauaveina lona tofiga pe a mavae atu o ia.
