Ua filifilia nei le Ofisa Sili o le Pulega o Tagata Tafafao Maimoa mai Fafo a le atunuu ma sui taitaifono o le Faalapotopotoga o Turisi i le Pasefika poo le Pacific Tourism Organisation.
O le susuga ia Faamaatuainu Lenata’i Suifua lea ua faamanuiaina i lenei tulaga maualuga ma o
le sui foi o Samoa o le vaiaso na tea nei na faamaonia mai ai e le Fono o Faatonu a le Faalapotopotoga e ala i se fonotaga na faatautaia. O lenei fonotaga e aofia ai sui 21 o atunuu eseese o le Pasefika ae le gata i lea o sui mai Faalapotopotoga tumaoti.
Na faafetaia e Faamatuainu le avanoa ua faamanuiaina ai i le tofiga ma ia taua o le a taumafai i malosi e gata ai aua le faatumauina o atinae o tagata e asia le Pasefika.
O lenei Faalapotopotoga e unaia ai atinae eseese uma a atu motu o le Pasefika i le itu tau turisi ma ma faavae i le tausaga e 1983 e oo mai i le taimi nei aua o se tasi lenei o itulagi ua tele ina asia e tagata maimoa mai fafo.
O le a galulue vaavaalua le susuga Faamatuaina ma le Ofisa Sili o le Pulega o Turisi mai le Atu Kuki ia Halatoa Fua lea na filifilia e avea ma taitaifono o lea Faalapotopotoga i le tausaga na te’a nei.
