Ua faailoa atu nei i le Fofoga Fetalai o le Palemene susuga Papalii Li’o Oloipola Taeu Masipa’u e ala i se tusi mai le pati faaupufai o le Faatuatua i le Atua Samoa ua Tasi, le filifilia o le faipule o Gagaifomauga 3 le susuga Laauli Leuatea Polataivao Fosi Schmidt, e avea ma ta’ita’i o le vaega faaupufai.

O se suiga lea ua faia ina ua faia le faai’uga a le vaega to’atele o faipule o le faafaletui e faamuta le avea ma ta’ita’i o le sui faipule o le itumalo palota o Lotofaga le afioga Fiame Naomi Mataafa, lea foi ua aveesea lona toe avea ma sui auai.

O le fono a le faafaletui o faipule e 20 i le Aso Tofi o le vaiaso nei na faia ai lea faai’uga ma toe filifilia ai nisi o sui o lana Komiti Faafoe.

O le sui ta’ita’i ua seei ai nei le faipule o le itumalo o Palauli 2 le afioga Leota Laki Lamositele Sio, sui ta’ita’ifono o le vaega faaupufai ua tulai ai le sui faipule o Falealili 1 le afioga Toelupe Poumulinuku Onesemo.

O isi tofiga o le Teutupe ua filifilia iai le faipule tamaitai o Palauli 1 le afioga Mulipola Anarosa Ale Molioo, ae lagolago iai le faipule o Siumu le tofa Tu’uu Anasii Leota.

O sui faipule o Salega Tasi, faipule o Faasaleleaga Numera 2, faipule o Lefaga ma Faleaseela, ma le faipule o Aana Alofi Numera 3 ua avea ma Fofoga o Alii o le faafaletui.

E to’atolu ua filifilia e avea ma failautusi e lē o ni sui faipule.