O le afioga Patele Mosese Vitolio Tui o se tamafanau a Samoa ma le Ekalesia Katoliko i lo tatou atunuu, ua avea nei ma Aki Epikopō e vaaia le Puleaga a Samoa Apia, ma ua suitulaga i le afioga Patele Alapati Lui Mata’eliga ua tuumalo, sa tauaveina le tofiga mo le 21 tausaga.
O le afioga i le faauluuluga o le Ekalesia Katoliko i le lalolagi, afioga Pope Faranisisi na ia faalauiloa lea filifiliga a le Vatikano i Roma i le aoauli o le Aso Lua o le vaiaso nei, ae o le 11 lea i le po o le Aso Lulu taimi i Samoa, ae o le 10 taimi i Niu Sila.
Ua savali nei i le 30 tausaga talu ona faauu i le tofiga Pelepitelo ma ositaulaga le afioga Patele Mosese Tui ina ua mae’a lona faauuga i le tausaga e 1994, ma o ia o se ositaulaga o le ituaiga o le Salesio o Ioane Poseko poo Don Bosco.
O le tausaga e 1995 i le tausaga e 2017 sa avea ma Pule aoga.
O ona tiute tauave i le galuega i Samoa o loo matamata tetele i le faatūina o le aoga a le Don Bosco i Savaii, lea sa taulamua ai le afioga Patele Mosese Tui i sailiga tupe mo se pasi e faaaogā e fanau aoga a le Don Bosco i Salafai.
O le tausaga e 2018 na tofia ai e galue o se faifeau Patele na te vaaia le Palisi poo le parish o St Paul ma Ranui i Niu Sila i le itu i Sisifo o le aai o Aukilani.
O le afioga i le Aki Epikopō filifilia o se tasi o faifeau ositaulaga o le Ekalesia Katoliko i Samoa e tausaafia ona uiga ma e lauiloa ma silafia e le toatele o le ekalesia i ana tala mālie e momoli ai le feau faaleagaga ina ia malamalama ma ofi gofie ai i loto o tagata tapuai.
