O lē sa avea muamua ma palemia o Ausetalia o Kevin Rudd lea ua filifilia o le a avea ma amepasa o Ausetalia i Uosigitone.
O le amataga o le tausaga fou e amata ai Rudd i lona tofiga fou e suitulaga ai ia Arthur Sinodinos o loo iai i le taimi nei.
O le Palemia sa ia folafolaina mai lea tulaga i le asō ma ta’ua ai le tele o le silafia o Rudd i le malo tele o Amerika ma o se aseta tele mo Ausetalia.
Na faailoa e Rudd i sana pepa o faamatalaga ua tuu mai i le autusitala, le lagona o le faagaeetia i le tofiga ua ofoina atu ia te ia.
Saunoa foi le minisita o le va i fafo Penny Wong e tele tagata iloga o Ausetalia ua tofia i nei tofiga ae iai taimi e ave ai le faamuamua i le tofia o i latou sa iai foi le silafia i tulaga faapolokiki e pei ona lotolotoi ai foi Rudd i se taimi ua tuanai.
