I le savalia ai o le valu masina o avanoa le tofiga o le Ofisa sili o le Ofisa o fuainumera faamaumauina a le Malo, o lea ua faamaonia e le kapeneta le filifilia o le Ofisa sili fou o le afioga Leota Aliielua Salani ua 30 tausaga o tautua o ia i lea ofisa o le Malo ae ua 15 tausaga o avea ma ofisa sili lagolago o lea ofisa tāua.
Faaalia i se pepa o faasalalauga o le afioga Leota Aliielua Salani o se tasi ua iai agavaa ma tomai i le faatinoina o lea galuega ma ua lava tāoso foi i le ta’ita’ia o lea auaunaga tāua a le Malo mo le atunuu.
Ua sui tulaga Leota i le afioga Aliimuamua Malaefono Tauā Faasalaina, na tuumalo ia Novema o le tausaga na te’a nei a o ia tauaveina le tofiga Ofisa Sili. E to’alua isi tagata sa talosaga i le avanoa, ae tolu tausaga le umi o le tofiga i aiaiga faakonekarate.
