I le toe lua masina atoatoa ma ni vaiaso o loo faagasolo ai tapenaga a Samoa i le fono a Malo o le Taupulega ia Oketopa, e toasefulutasi sui o Malo o le Taupulega sa afea Samoa mo le lua aso, i le fia silafia o le tulaga o iai tapenaga mo lea fono tele faavaomalo.
O le vaiaso ua mavae na faagasolo ai feiloaiga a lea sāvali ma sui o le komiti o tapenaga i le fia silafia o tulaga o iai nofoaga o le a faamautu ai ta’ita’i o Malo ma a latou usugafono, tulaga o iai auala o feoa’iga i le taimi o le fono, nofoaga eseese o le a faia ai nisi o faatasiga i lea taimi, ma le nofoaga autu o le fono a ta’ita’i o Malo o le Taupulega le maota fono o le Palemene i Mulinuu.
I se pepa o faamatalaga ua faailoa lautele ai e faapea o se faiga masani lea mo atunuu e talimalo o le tatala o le avanoa e faia ai asiasiga i nofoaga o lea fono, ma isi vaega uma e fesootai i lea taligamalo.
E lua aso o feiloaiga a sui e toasefulutasi o Malo o le Taupulega na malaga mai mo lea asiasiga lea sa feiloai ai ma sui o le komiti o tapenaga sa ta’ita’ia e le Ofisa Sili o le matagaluega o le va i fafo ma fefaataua’iga le afioga Peseta Noumea Simi.
O nisi o vaega tāua sa faasoa iai sui o lea aumalaga ma le komiti o le tulaga o loo iai tapenaga i le itu i le puipuiga poo le security, fesootaiga, tulaga i tapenaga mo le auaunaga a tusitala ma le aufaasalalau faapea foi i feuiuia’iga i le to’ai taunuu o usugafono i le malaevaalele ma le taimi e tuuvaa ese ai ma le atunuu.
O le faai’uga o le masina nei o le a toe afea ai le atunuu e se isi aumalaga o sui lava o Malo o le Taupulega mo se isi asiasiga i le tulaga o tapenaga uma mo lea fono faavaomalo e silia i le 50 atunuu o le a auai o latou ta’ita’i ma latou usugafono.
I se tasi o tala e fesootai i lea lava fonotaga, o le amataga o lenei vaiaso na faailoa lautele ai e le Tupu o Peletania, Lana Maiesetete Salesa III faapea lana Masiofo o Camilla le la asiasiga taualoa i Ausetalia i le masina o Oketopa lea o le a afea ai ma Samoa.
Ua mae’a ona faailoa e le ta’ita’i o le Malo le afioga i le Palemia i le tauaofiaga a le Palemene talu ai nei, le malaga taualoa a le Tupu ma lana Masiofo i lo tatou atunuu lea o le a afea ai foi Samoa ona o le faauluuluga lea o Malo o le Taupulega o ia na te tatalaina aloaia lea fonotaga.
