O le polokalame lenei o loo taulamua ai le Matagaluega o Siosiomaga lea ua mafai ona fesoasoani iai autalavou i nisi o afioaga e aofia ai Leusoalii, Vailima, Tafitoala, Saleilua, Vaitele, Togitogiga, ma Leauvaa i le faamiliina lea o fatu laau, o le fuiina ma nisi o vaega e faatino mo le 2 vaiaso.
I faamatalaga mai le Matagaluega e 7 autalavou o loo gafa ma nei galuega mo le faamoemoe e totogiina le ta’i $5000 i le autalavou mo lenei fesoasoani pe a mae’a le 5000 o fatu laau i vaega uma e ao ina faatino ae peitai ua silia ma le 5000 fatu laau ua mae’a tapena e nei autalavou.
O le faamoemoe o lenei polokalame ia toe totōina ai le tele o vaomatua a le atunuu i le galulue faatasi ai ma autalavou i le faafaileleina o nei laau.
E faafetaia ai e le Matagaluega le lagolagosua i ana polokalame fai e faapitoa lava i tupulaga talavou lea ua mafai ona fesoasoani i lenei polokalame auā le tausiaina lelei o le vaomatua ma le siosiomaga.
