Ua tuifesili le minisita o felauaiga Michael Wood pe na faapefea  ona taofia galuega  toe faaleleia i se tasi o auala i Cambridge ina ua tulai mai le faigamalo ua iai nei. 

Na tuuaia e le fofoga o le polokalame a le AM, Ryan Bridge le alii minisita i le faataamilo solo o ana tali i fesili e faatatau i le mataupu lea.

Fai mai o le auala tonu lea na maliliu ai tagata e toatolu i nai vaiaso e lei mamao atu ma o se mataupu ua leva ona faatagi ane ai i latou o loo aumau i lea faaitu. 

I le amataga o le vaiaso nei na faailoa ai e le NZ Transport Waka Kotahi o galuega toe faaleleia i lea auala sa faatulaga mai e avea o se expressway e fa laina na toe taofia ina ua tulai mai le Leipa i le 2017.

O le vaiaso nei ua lipotia na tuuina atu ai se tusi mai pulenuu e toatolu o Waikato i le alii minisita e talosaga ai le faia o se gaioiga vave i lea auala, e le o ta’ua mai i le lipoti se tali a le minisita i finagalo faaalia o tagata.