O le saunoaga a le taitai o le Itu agai le tofa Lauofo Fonotoe Nuafesili Pierre Lauofo Meredith na taualuga iai saunoaga faalauaitele o le tala autu o le tupe, ae o se tasi o vaega na ia fesiligia ai le Malo o le siitaga o totogi ua fuafua i le tala autu o le tupe mo tagata faigaluega uma a le Malo e aofia ai i latou o umia tofi taualoa o le Malo.

E lua tausaga ua fuafua e faagasolo ai ona faatino le siitaga lea e amata i le masina fou i se vaegatupe e 10 miliona tala ua aumai i le faalapotopotoga o taui o faalavelave faafuasei.

O atugaluga o le taitai o le Itu agai, o tupe o taui o faalavelave faafuasei o loo maua mai tupe totogi e ta’i tālā a le tagata faigaluega e aveese i le taimi e maua ai le totogi, peitai ua na o tagata faigaluega a le Malo o le a selesele iai, ae e le o aofia ai tagata faigaluega o le vaega o pisinisi tuma’oti le private sector auā o loo totogi foi a latou seleni i lea faalapotopotoga a le Malo.

O le isi fesili a le taitai o le Itu agai, pe o le a faaauau pea ona faatino le siitaga o totogi i tupe mai lea faalapoptopotoga pe o iai se isi fuafuaga a le Malo i se isi alagatupe e faatino ai seia mae’a ona faatino le siitaga o totogi i totonu o le lua tausaga. 

O le taugata ua iai nei pasese o vaalele o le tasi lea o mataupu na fesiligia ai e le taitai o le Itu agai le Malo, poo afea e toe maua ai se vaalele tele mo malaga sa masani ai, a o lei toe faafoi le vaalele tele 737-800.

O le finagalo o Lauofo pe ono maua se laisene faavaitaimi mo se kamupani vaalele e malaga i le va o Samoa ma Niu Sila ia maua ai se pa’ū o pasese, ona o lea e na o le kamupani vaalele o le Air NZ o loo tautuaina lea alavaa i le taimi nei.

O lea ua amata tali Minisita o le Kapeneta i mataupu sa lagalagā i saunoaga faalauaitele a sui faipule, ma o le a tali ai ma fesili a le taitai o le Itu agai le tofa Lauofo Fonotoe Nuafesili Pierre Lauofo Meredith.