Ua mae’a ona fālē ma soalaupule e le Komiti Faafoe o le poloketi miliona a le malo le mataupu sa fesiligia ai le faaaogāina o le vaegatupe e 175 afe tālā, e le Fono Faavae a le itumalo faapalota o Faasaleleaga 2.

O le taotoga o lea mataupu e pei ona sa faailoa e le Minisita o loo iai le vaaia o le poloketi, ua faamalieina le komiti i le lipoti o le faaaogāina o le vaegatupe ma o le a toe faamatuu le 175 afe tālā na taofi mai le tufatufaga o le miliona lona lua ona o le tuua’ia o le lē lelei ona faaaogā lea aofa’iga o seleni mai le tufatufaga o le miliona muamua.

Peita’i o le sainia o maliega a nisi o Fono Faavae ma le malo i le Aso Gafua o le vaiaso nei, na fesili ai le sui ta’ita’ifono o le Fono Faavae a Faasaleleaga 2 i le Minisita, pe aisea ua le avatua ai le 175 afe. E leai se finagalo o le Minisita o loo iai le vaaia o le poloketi le tofa Lagaaia Ti’aitu’au Tufuga, ae sa tāpa se finagalo o le sui ta’ita’ifono o le Fono Faavae a Faasaleleaga 2.

Le sui ta’ita’ifono o le Fono Faavae a Faasaleleaga 2 susuga Suāfo’a Sasagi. 

O le amataga o lenei vaiaso na sainia ai maliega a nisi o itumalo palota ma le malo mo le faamatuuina o ulua’i vaegatupe ta’i fituselau afe o le miliona lona 3.

Ua faailoa ai e le Minisita o loo vaaia le poloketi ua 30 itumalo faapalota ua mae’a sainia maliega mo le tufatufaga o le miliona lona tolu, lona uiga e 21 itumalo palota o loo totoe.

O itumalo ua sainia  maliega i le Aso Gafua, o Lefaga ma Faleaseela, Faasaleleaga 2, Sagaga 2, ma Safata 1.

O loo iai ma Aana Alofi 1 i le lisi o itumalo ua agavaa i le tufatufaga lea, peita’i e le’i auai ni sui o le Fono Faavae a lea itumalo faapalota.  

Se vaega o le saunoaga a le Minisita o Tina ma Tamaitai Atina’e o Afio’aga ma Agafesoota’i o loo vaaia le poloketi o le miliona, le tofa Laga’aia Ti’aitu’au Tufuga.