Ua uma le vaega muamua o le pili a Samoa i le mau o le sitiseni i Niu Sila e pei ona faatumuina ai pepa o submissions ma tuuina atu i totonu o le Palemene a Niu Sila.
Ua mae’a foi ona tolaulauina le tele o nei faamaumauga a tagata taitoatasi a le komuniti a Samoa ae faapea foi ma isitagata mai isi atunuu o loo lagolagoina le mau o le sitiseni a Samoa.
Ae o le isi la laasaga o lea ua agai iai le tafatolu o le mau a Samoa, le Fono Faufautua, faapea le Pacific Leadership Forum ma le Mafutaga a faifeau soofaatasi o le savalia lea o pati taitasi a le Palemene o Niu Sila ina ia aumai se latou foi tofa auā lava le lagolagoina o le mau o loo i le laulau a fono a le Palemene.
O le Aso Lulu 3 o Iulai na feiloai ai loa le ta’ita’i o le pati o le ACT, Hon David Seymour ma le mamalu o Samoa potopoto i le maota o Samoa i Magele.
O lea ua amatamea le pati o le ACT i lea feiloaiga ona o le naunau lava o le atunuu se’i saili mai le tofa tatala a neita’ita’i auā le manuia o Samoa.
Na auai susuga i faafeagaiga ma o latou faletua, o le afioga i le Konesula o Samoa i Aukilani, Afioga Afemata Palusalue Faapo II, o tamā ma tina matutua, o faauluuluga o nisi o kamupani ma pisinisi faapea le loaloa o le atunuu na agai atu se’i faalogologo poo le ā se lagona o le ta’ita’i o le pati o le ACT i lenei pili.
Na amata le faamoemoe i le sauniga lotu na saunia e le afioga ia Patele Michael Alipia Endermann, ona sosoo lea ma saunoaga a nisi o tamalii o le atunuu le afioga ia Fepuleai Semi faapea le tofa ia Leulumoega Teleiai Edwin Puni, faatasiai ma le Fofoga o le aso le afioga ia Leiataua Savea Al Harrington Lavea.
Na maualuga le faamoemoe ina ua pati le ‘ava o le feiloa’iga e pei ona masani ai Samoa i ana taligamalo, ae safaapea foi ona tauaaoina faaaloaloga a Samoa e faailoa ai le agaga ma le loto fiafia o Samoa i lenei mafutaga.
I le saunoaga a le susuga i le ta’ita’i ia David Seymour na ia toe faamatalaina ai le taimi o lona laititi faato’ā 12 ona tausaga a o aoga i le Raumanga Middle School, na fuafua ai le malaga a le latou aoga mo Samoa, na fai a latou sailiga tupe auā le latou malaga peitai ane e lei mafai ona alu le malaga ona ua tapunia le aoga.
Pe tusa ma le 25 tausaga mulimuli ane ai, ae ia mauaina se tusi mai le afioga i le tamaitai Palemia i lena taimi, Hon Jacinda Ardern ina ia auai atu latou te malaga i Samoa faatasi ai ma le alii minisita, Hon Aupito Su’a William Sio.
Sa iai lona naunauta’iga e fia alu i lea malaga ona ua leva ona ia fia feiloai atu ia Fiame Naomi Mataafa, ona sa ia maofa i se atunuu e sili ona laititi ae e matuā malosi lona faatāuaina o faiga faatemokalasi moni.
Saunoa le susuga i le ta’ita’i ia David Seymour e tatau ona lafo le pili poo le mau i le komiti faafoe e iloilo ma faalogo iai i lagona ma leo o tagata, ma e iai i latou e fesiligia lea pili pe aisea ua toe suia ai le tulafono mai le tausaga 1982.
Ma o le taimi nei e lē o faalogo o iai nisi o fesiligia lea pili, ma e iai le talitonuga ua mautu le filifiliga a le komiti faafoe i lea pili poo le mau.
