O le aso ananafi lea na fai ai le feiloaiga a le Sui Faapitoa o le Malo o Saina i Mataupu tau i le Pasefika, Susuga Qian Bo ma le Afioga i le Palemia, Fiame Naomi Mataafa.
I faamatalaga tusitusia e le nusipepa o le Savali, o lenei faigamalaga o loo auai ai le Failautusi ia Jiang Tang faapea ai ma le faaliliuupu ia Liu Chengyin.
Na mae’a le feiloaiga ma le Palemia ona faaauau ai lea o lana asiasiga i le Maota o le Palemene o Samoa i Mulinuu ma feiloai ai ma le Afioga i le Fofoga Fetalai, Papalii Li’o Oloipola Ta’eu Masipa’u.
Na faailoa ai e Papalii le agaga faafetai i le Malo o Saina mo fesoasoani o loo tuuina mai pea mo le lagolagosua ia Samoa ma ona atina’e.
O le faimalaga mai ai o le Sui Faapitoa o Saina i Samoa o le talanoaina lea o mataupu ina ia faatumauina ai pea le vavalalata o le faigapaaga a Malo e lua.
