Ua faamaonia mai e le pulega o le matagaluega o le soifua maloloina i Samoa le toe maua o nisi i Niu Sila i le faama’i o le misela, ma ua toe fautuaina ai mātua ma tagata uma o le tatou atunuu i Samoa, ina ia agai e fai tuipuipui o le faama’i misela, rupela ma le mami pe afai e lei faia ni tusi o le fanau, pe e lei mae’a foi ona fai o latou tuipuipui.

Ua faataalise mai lea fautuaga a le soifua maloloina ina ia nofouta iai lo tatou atunuu, auā e lē o galo le pipisi o lenei faama’i i le fā tausaga ua tuanai ma fano ai ola o fanau ma nisi e matutua.

O le faama’i misela e pipisi ma e faigofie ona feavea’ia e le ea pe a tale ma mafatua le tagata ua aafia.

E aafia foi pe afai e pa’i atu i nofoaga ma laualuga o meafaitino na tale ma mafatua ai le tagata ua aafia.

E maualuga le avanoa e aafia ai le tagata e lei faia sona tuipuipui o le misela aemaise pe a e latalata ma nonofo faatasi ma le tagata ua aafia. 

O āuga ma foliga vaaia o le Misela e aofia ai le fiva, mātūtū le tale, mūmū pe fulafula mata, tafe le isu, mafatua soo, pata le ulu ma faasolo atu le tino atoa, vaivai ma gagase tino,ma lē manogi se meaai pe oso foi se fia tausami.

O ooooga poo aafiaga tuga o lea faama’i, e aofia ai le tiga o taliga ma oo ai ina lē lagona se mea, tatā le manava, fula le fai’ai ma oo ai ina aafia i nisi o aafiaga tumau o le soifua, nimonia ma ono oo ai ina maliu.