O le ono ile taeao o lenei aso Tofi i Samoa sa molimauina ai le maualuga o le sua o le tai ona o le tai o’oo’o.
Ua faamauina ai e le ofisa vaai tau o le aso lenei ua pito maualuga ai le tatau o le sua o le tai ilo tatou atunuu mo lenei tausaga, ma matauina ai le sousou ma le peaua o gataifale ma le faatautau o savili, ma ua faamalosia ai lapataiga mo ogasami uma o le atunuu.
Ua faailoa e le ofisa o le vaaitau i lana upega tafailagi o le maualuga o le sua o le tai e tele ai se avanoa e ono aafia ai matafaga ma nofoaga tulata ile sami i galu fafati ma lologa i nofoaga tu matafaga.
O le tai o’oo’o ua aofia uma ai Samoa peitai o nofoaga e aupito i sili ona lamatia i lologa i nofoaga tu matafaga ma galu fafati o Manono, Apolima, o vaega i sasae ma saute o Upolu mai Aleipata, faasolo ane i Falealili, Siumu, Safata, Lefaga ma Falelatai.
O nofoaga i sasae ma saute o le motu o Savaii e aofia ai afioaga o Tafua, faasolo i Palauli, Satupaitea, ma Salailua faapea Salelologa ile agai atu i Puapua.
