I le sauniga lotu mo le faamanatuina o le tutoatasi o Samoa i le po anapo lea na lauga ai le Taitai o le Ekalesia Katoliko i Samoa Akiepikopō Alapati Lui Mataeliga e faamalosiau ai ia Tuilaepa ina ia manatu i le atunuu.

I le lauga a le Akiepikopō na ia faatusatusa ai le tala mai le Tusi Paia ia Iesu ma Ioane i le taulaga ua iai Samoa na ia taua ” o tama ia e toalua na filifili e le Atua e faatini ma faataunuu ana fuafuaga mo le faaolataga, O le tasi na maliu maletile, ona o lona alagaina o le faimeatonu ma le lē foi pe fefe i pulega faalemalo ae ua tautino i le tupu lana agasala ma le mea leaga ua ia faia, o le tasi na molia lava e lona nuu ma faakoluseina e le Malo Roma ma o lona toto na faapena ona fetāfea’i i totonu o le lalolagi i le sakalameta o le eukalesitia ma faaolaina uma ai tagata uma o le lalolagi, o nei alii na a’e malo o la faiva ma le la tautua”

Ae le gata i lea na ia faatusa foi i le vaitaimi o le pologa ma le maasiasi o Samoa i pulega a malo ma tagata ese, e pei o Tonga, Siamani ma Niu Sila ma o se tasi o taeao taua o Samoa o le mafuaaga lea na tutoatasi ai le atunuu ina ua fetafeai le toto o Tamasese ma nisi na manunu’a i le aso o le Mau ma tagi mai e faapea “manatua le matou faigataulaga ia maua lo outou malo”

Ua silafia uma e le lalolagi atoa le tulaga o loo iai Samoa i ana upufai o Malo lea e oo mai i le taimi nei e le’o mautu lava se faigamalo mo le atunuu.

Taua e Alapati “o taeao lea e faamamalu ai le aso taua mo Samoa, o lona tutoatasi ae o lea lava e fesouaina ua leai se tasi, e pei e foliga mai ua maligi vale le toto o nei tamā, faaaunu’ua, leai se aoga ona o tagata ma faigamalo i nei ona po ua saili i le pule”

Na auai le taitai o le Vaega faaupufai a le HRPP Tuilaepa Lupesoliai Sailele Malielegaoi i lea sauniga ma na taua e Alapati “faamolemole o Samoa e pule, o outou o tavini ma auauna a Samoa ana leai Samoa e leai se outou, tatau ona manino ia Samoa lena mea, o le pule lea e tiu ai i latou ma soona fai i tatou o le pule a outou, a tou finagalo foi e aveese, e aveese”

Fautuaina foi e Alapati taitai o vaega faaupufai e lua Tuilaepa ma Fiame ina ia tuu mai se tali mautu mo Samoa ua taligā le atunuu.

Na faaiu le lauga a Alapati i lona faamanino ai o le faavae moni o Samoa o le Atua lea “o le faavae o Samoa e le’o se tusi e tusitusia ae o le Atua soifua , faavae ola, tautuana ma tatou Samoa o le ta faavae moni lena”