O le tagata sa agai ane ma se auupega na fana e leoleo i fafo ane o se ofisa faafomai i Niu Sa Uelese, ua faamaonia ua maliu.
O Alexander Stuart Pinnock 34 tausaga le matua, na agai i le medical centre lea i Nowra i le aso ananafi lea na lipotia na lē fiafia ai a o fesagai ma se fomai ma ia faailoa ane ai se fana.
Na valaau ane leoleo i le mataupu ma faia ai feutanaiga ma lea tagata mo se umi toeitiiti lua itula.
Na mafai ona sosola ese mai tagata e toafā sa iai i totonu o lea falemai ma i le taimi o feutanaiga ma leoleo o loo lipotia na agai ane ai Pinnock i fafo o le falemai ae lei fia siilima ane i leoleo.
Fai mai sa faalala ane lana fana i leoleo ma gaioi ai loa ma leoleo ma fanaina, sa maliu ai lava i lea nofoaga.
O loo ta’ua i lipoti e lei iai ni talaaga solitulafono o lē ua maliu peitai sa iloa lava e leoleo ona o nisi o faaletonu tau le mafaufau ma le soifua maloloina sa aafia ai.
