E lua tausaga ua falepuipui ai se alii sa galue o se tausi soifua i le falemai.
O lea soligatulafono na tulai mai i le masina o Me i le tausaga na se’i mavae atu.
E lē o mafai ona faalauiloa le suafa o lea alii ma lē na aafia ona o puipuiga o le tamaitai na aafia.
O atugaluga a le afioga i le Faamasino o Leiataualesa Daryl Clark e afua mai i le faasalaga o se alii tausi soifua faamauina 29 tausaga le matua, i lona faia o se faaoogalima matagā i se tasi o tamaitai tausi soifua i le tausaga na se’i mavae atu.
I faamaumauga a le faamasinoga na manino ai e ui ina ioe lea alii i lana soligatulafono, peitai na faasee atu lea alii e galue i le Falemai i Tuasivi e faaauau ai ona tiute faatausisoifua.
Ta’ua e le alii faamasino, ua ia leiloa pe faapefea i le Matagaluega o le Soifua Maloloina ona faataga lea alii e faatino le auaunaga i le mamalu o le atunuu ma galulue faatasi ma isi tagata faigaluega a le matagaluega, ae o loo aafia i se soligatulafono matuia.
O le isi itu na maofa ai le afioga i le Faamasino, o le mananaia o lipoti na tuuina atu e le matagaluega e faamatalatala atu ai le ituaiga tagata e iai lea alii, aemaise o lona soifua galue i totonu o le matagaluega, peitai e lei iai ma ni faamatalaga na tuuina atu e faatatau i le mataupu na tulai mai i le tamaitai na aafia.
O itu na faaleo e le alii faamasino e ogaoga ai le soligatulafono a lea alii e aofia ai, o le nofoaga na tulai mai ai le soligatulafono o totonu o le maota gasegase o le nofoaga e tatau ona saogalemu ai lē na tagi, ma le ogaoga o gaioiga a lea alii na fai i lē na tagi.
Na talosagaina e lea alii le faamasinoga ina ia faapafala le faasalaga ona o aafiaga o le a iai lona tagata i le itu tau i galuega pe a faamaonia le soligatulafono, peitai e lei talia e le faamasinoga.
Faailoa e le alii faamasino o ana gaioiga na fai e ogaoga tele, ma o le faasalaga a le faamasinoga e faamanatu ai e lē gata ia te ia ae o i latou foi o loo iai le mafaufau e faatino ni soligatulafono faapea, e lē vaivai le faamasinoga e tuu atu faasalaga faafalepuipui ia i latou e faia uiga faapea.
