O le mae’a o taaloga a le Olimipeka sa faia i le atunuu o Farani ma ua toe taliu manuia mai i Samoa lana autaalo, o le Aso Lulu o le vaiaso nei na faia ai toe sauniga ma lagomau i lona aiga i Malifa le faiaoga o le aufusu a le atunuu le susuga Lionel Elika Fatupaito, lea na maliu faafuase’i i Farani a o auai i taaloga a le Olimipeka.
O ona toe sauniga sa auai le Minisita o le Matagaluega o Taaloga ma Alaga’oa mo le Soifua Fiafia o Tagata, o le Pelesetene, le Ofisa Sili ma sui o le ofisa o taaloga a Samoa le SASNOC.
O le Minisita le afioga Laumatiamanu Ringo Purcell sa fai ma sui o le Malo e faia se molimau mo le faiaoga, o se tasi ua iloga i le taaloga o le fusu ma sa manumalo ai i ni pine i taaloga a Malo o le Taupulega, ma taaloga a le Pasefika.
