Taoto pea ia peau lagatonu nai le vasaloloa aua paia sautuafafafa o Samoa mai le tai samsama o le Tui Manua se ia paia eleele sa o le Alataua.

Faámalo le tatalo ae maise o lou tulai Samoa i finagalo tusitusia e 25,000 sa tuuina atu i le soakomiti o le Palemene o Niu Sila e lagolago ai le pili taufaáofi a le faipule o Teanau Tuiono mo le toe faáfoi mai o le sitiseni o tagata Samoa na toe aveesea e Niu Sila i lana tulafono o le 1982. 

E momoli foi le agaga faáfetai tele i faálapotopotoga, ekalesia ma tagata taitoatasi o loo faia folasaga i luma o le soakomiti o le Palemene o loo faásolo nei i Ueligitone ma Aukilani.

Peitai o le pasia o lenei pili taufaáofi e faámoemoe lea i le lava o vaega faáupufai o loo i le Maota e lagolago pe a faia le tolaulauga 2 ma le 3. O le ala lea o le aé o le tofa ma le moe e savalia e Samoa vaega faáupufai taitasi e pei o le Labour, National, New Zealand First, Green, ACT ma le Te Pati Maori. Aua nei pei o le tautai e manao i le vao ae fefe i aitu.

E talo atu ai ma le agaga faáaloalo I le paia o Samoa e faápea. O le Aso Lulu, 3 Iulai i le Fale o Samoa i Mangere o le a faia ai se feiloaiga a Samoa potopoto ma le taitai ia David Seymour faápea faipule o le ACT Party i le 10am. E taua tele lo tatou auai e momoli la tatou talosaga. O lenei tapenaga o loo taimua ai le Pacific Leadership Forum, Fono Faufautua a Samoa ma le Mafutaga Soofaátasi Faifeau Samoa.

Mo nisi faámatalaga, faáfesootai le numera (021) 618-42

Post expires on 3 July, 2024