Ua vaaia le vevesi o nisi o le atunuu i luga o fesoota’iga televavave i le tulaga ua manatu ua suia ai upu o le vii o le atunuu lea na usuina i le tatalaga o le Fonotaga a ulu o Malo o le Taupulega i le vaiaso ua mavae.

E pei ona silafia o le aufaipese tuufaatasi a a’oa’o Malua ma Piula ma o latou faletua sa usuina lea vii o le fu’a, o le aufaipese lea na faia faapitoa lava mo lenei faamoemoe.

E ui i le matagofie o le lagiina o le vii o le sa’olotoga o le atunuu e lei māmā ai faitioga a tagata ina ua lagonaina ma manatu ane ua iai fuaiupu ua suia o le vii o le sa’olotoga o Samoa.

O ananafi na faailoa mai ai e lē sa ta’ita’iina lea faamoemoe ma taumafai e faamaopoopo ma a’oina aufaipese mo le tatalaga o le fono, le Afioga Tanuvasa Faamanatu Solomona e ala i sana tali mai i luga o le facebook e tusa ai o lagona ma manatu faitio o le atunuu i le tulaga ua iai le vii o le sa’olotoga o Samoa.

Na ta’ua e Tanuvasa o lē sa ia fatuina le vii o le afioga Iiga Sauni Kuresa o ia foi lea na ia faia se suiga lona lua o le vii.

O le suiga lona tolu na suia lea e le Susuga Ueta Solomona ua faiilagi le folauga.

Na faailoa foi e Tanuvasa o le fātuga a Kuresa na avea lea ma Vii aloa’ia o le atunuu ma faamauina le onaina lea e le malo o Samoa i le tausaga e 1962 ina ua tuto’atasi. 

Peita sa faatonuina lē sa ia fatuina le vii e le Malo i le saua’iga o pulega i na vaitaimi ina ia faia ni suiga i le vii.

Na faailoa e Tanuvasa e leai se suiga na ia faia, ae i lona manatu o suiga sa faatonuina e le malo o le pule faamauina lea o le vii o le atunuu ma sa fua foi ia suiga i vaitau ma tulaga sa aga’i mai ai faigamalo e pei o le suiina o le fuaiupu Samoa tula’i ma sisi lau fu’a….i le fuaiupu Samoa tula’i ua agiagia lau fu’a.

O le faaseā a le to’atele e mafuli lea ina ua aveesea le fuaiupu o le faailoga lea o Iesu na maliu mo Samoa ae ua tuuina iai le suiga lona tolu o Samoa ua mafai ona tautai.

Ua faaalia e Tanuvasa o suiga uma lava nei na faia ma faatonuina e le faigamalo sa iai i na vaitau.