Ua ave le lapataiga a le Fofoga Fetalai o le Palemene le susuga Papalii Li’o Oloipola Ta’eu Masipa’u i le taitai o le vaega e puipuia aiātatau a tagata o le faipule o Lepa le susuga Tuilaepa L Sailele Malielegaoi, e taofi lona talanoa i le lipoti a le Komisi Suesue o faigāpalota ua mae’a ona faataatia i le laulau a fono a le Palemene i le masina o Iuni.

O le manatu o le Fofoga Fetalai, ona o loo soalaupule e le komiti o tulafono tumau, mataupu tau faigāpalota, talosaga ma tofiga faalefaavae ona tuuina atu ai lea o se lipoti o ni iloiloga a lea komiti i le laulau a fono mo le soalaupuleina ma faia iai se finagalo o le fono aoao faitulafono.

E lē o faailoaina e le Fofoga Fetalai le suafa o le sui usufono ua faatalanoaina nisi o fautuaga a le Komisi Suesue ma ua ia faamatala foi iai ni ona lagona i le faauigaina, peitai o le taitai o le vaega faaupufai e puipuia aiātatau a tagata i se feiloaiga ma tusitala ma ona manatu tusitusia i se nusipepa sa ia faailoa ai nisi o fautuaga a lea Komisi Suesue.

Faaalia e le Fofoga Fetalai o nisi o ia manatu e lē sa’o ona e lei talanoaina le lipoti ma faia iai se faaiuga.

O le feiloaiga a tusitala ma le susuga Tuilaepa L Sailele Malielegaoi i le aso ananafi sa faaalia ai sona finagalo i le tusi atu a le Fofoga Fetalai.

O le feiloaiga lava a tusitala ma le susuga Tuilaepa L Sailele Malielegaoi na ia faaalia ai e sese tala ua faasalalau i upega tafailagi ua ta’ua ai ua faatea o ia ma lona nuu ma le itumalo.