Lelei le paka mo taavale, faafeiloai I faitotoa, laei mamanu Pasefika ma laufofoga fiafia
O auaunaga uma nei na oo iai le talimalo a le Capital and Coast District Health Board ao faasolo tui mo le komiuniti Pasefika I lea vaega o le atunuu
O le aso ua taua foi o le Pacific Vaccination Festival Day I Lower Hutt, o le aso lea ananafi, na amata faasolo ai le silia ma le 5000 tagata Pasefika ma o latou aiga o loo tulimataia e le pulega
I le tele o vaega o le atunuu o lea o loo faasolo tuiga mo le kulupu lona 3, poo I latou nei e maualuga le ono lamatia I faamai pe a pesia I le Koviti
Peitai, o le suiga ua faia e le Capital ma le Coast District Health Board ua faapau mai ai mai le 65 tausaga I le 55 tausaga o tagata Pasefika ma Maori e mafai ona faia tui
E le gata ai la I tagata matutua, ae o loo mafai ai foi ona omai faatasi ma tagata o o latou aiga
Molimau ai le faatonu o le pulega, Tagaloa Junior Ulu, o se avanoa fai tutusa ua faamalosia ai le omai faatasi o aiga
O isi aso ma nofoaga mo tui ua fuafua nei mo Porirua, Kapiti ma Ueligitone, ma e eseese lava taimi ma aso o loo tatala ai nofoaga mo tui ina ia mauavanoa ai foi ma tagata faigaluega e le avanoa I le ao
Molimau a nisi o tagata Samoa o loo faia tui I nei nofoaga e tusa ma tala a le leitio Niu Sila, o le mau galuega o tagata Pasefika I nei nofoaga o loo faia ai tui, o se avanoa foi e saga faamausali ai i o tatou tagata le saogalemu o le tui, aemaise o le toatele o loo tuufesili pea
