E to’a 13 tagata ua molia e leoleo e aofia ai ma le tofi Pulenuu o le afioaga o Lotoso’a Saleimoa ona o se gaioiga solitulafono ua tuuaia ai i latou ia e mafua i se finagalo o matai o le nuu e saisai se tāmā ona avane lea i luma o le afioaga ona ua faatautee i le finagalo o Alii ma Faipule.
O atalii e toalua o le tamā na faia iai le iuga e faatulai ese i laua ia ma le afioaga sa o lā lē usitaia lea togisala. Ua faaalia e leoleo i se lipoti o le niusipepa o le Sunday Samoan o le 13 o moliaga ua aofia ai ma ni matai se to’aono ma o moliaga o le ulufale faamalosi, faaoolima ma le tū fua i le fanua e aunoa ma se mafuaaga faaletulafono ua molia ai.
O loo faia foi se suesuega a leoleo i se gaioiga ua tuuaia ai ni matai o ni faiganuu a Matautu Falelatai ua latou faasā ai fanau a se isi vaega o tagata o le afioaga ua ese le latou faiganuu ona toe agai atu i le Aoga Tulaga lua a le afioaga.
Ua faaalia foi e leoleo o se tasi o tuuaiga o le tapu lea e le faiganuu tele ona toe faaola paipa a ia aiga o le mafuaaga o ia faaiuga ona o se lotu Aso Fitu Tutoatasi ua iai nei i le nuu ma e le’o le faavae lea o le afioaga ona e lotu tausavali tagata isi tapuaiga.
O le tasi o mataupu e aafia ai lava pulega a nuu ua iai nisi ua molia nei e leoleo i le faaiuga na faatulai ese ai se aiga mai le afioaga o Faleū Manono. Ua molia foi nisi i le faatupu o se mū i le fale o lea aiga.
Ua lipotia se finagalo o le Minisita o Leoleo ma Falepuipui afioga Lefau Harry Schuster ua ia tuuaia ai tulafono e tolu lea na pasia e le Palemene ia Tesema o le tausaga na te’a nei ua faamautu ai le malosi o le aiā lautele poo le communal rights ua avanoa ai matai o nuu ona faia ni faaiuga e afaina ai le aiā tatau o tagata taitoatasi ma ua soli pala ai ma le faavae o pulega a malō temokarasi.
