O molimau ma faamatalaga e faapea o nisi o le au malaga e to’a 73 mai Brisbane i Ausetalia lea ua aafia nisi i le faama’i ina ua taunuu atu i Samoa sa malaga atu ai ma nisi i le faamoemoe e fia auai i se maliu. 

Ua faaalia e se molimau faatuatuaina o tagata uma e malaga atu i le faamoemoe e toe foi atu i le atunuu o le taliaina e malaga atu o le faaiuga lea e fai e le Matagaluega o le Va i Fafo a le Mālō. Sa fesiligia le taitaifono o Komiti o Faalavelave Faafuasei i le mataupu lenei ma ia faailoa ai o loo faia iai se sailiiliga pe faamaonia. 

Taua e Agafili Shem Leo “O tapu a ia e pei ona saunoa ai o tapu ia i lalo o tatou orders e matuā lē faatagaina vaega na, ma o le ala foi lea aemaise a i malaga e agai mai fafo e iai le process e talosaga mai, iloilo, e leai ma se talosaga na aumai iai matou e faapea mai faamolemole matou te fia oatu i le maliu o le matou aiga matou toe omai ai. Aua o lae iloa lelei e sa ma e faafesootai i le Matagaluega a le Foreign affairs, o i latou uma ia na faataga mai lea na omai”.

Taua foi e Agafili “O le tali mautinoa a pe a talosaga atu nisi e fia malaga mai Samoa mo se maliu, e leai se mea faapena e tupu. O lea foi e maua tala sala tua i vaega ia  e oo ai foi la suesuega a le tatou Komiti iai latou nei aua o loo manino aiaiga afai ae sau i nei o seisi mafuaaga e fafa ai luga le sala, e tuu atu le Ofisa o Leoleo e fai e latou suesuega o vaega nei”.

Na faamanino ai foi e Agafili e leai se aiaiga e malaga atu ai seisi i Samoa ona o ni faalavelave tutupu.