E telē se tapenaga ua feagai nei ma le pulega o le Lakapi Samoa i le faamoemoe autu ia siitia le tulaga o le taaloga lakapi i le atunuu, ma ia faatino nisi atinae mo le faatumauina o le maualuga o le taaloga, a o tu ai le loma o le faamanatuina o le 100 tausaga o le lakapi i lo tatou atunuu lea o le a faatino i le tausaga nei.
I se pepa faalauiloa mai le Lakapi Samoa i le faaiuga o le tausaga na tea nei, ua faailoa ai le faigapaaga a le Lakapi Samoa ma le Maven International i le tulaga o se corporate commercial partner.
Ua ave ai le faatalauula a le Lakapi Samoa i ni pisinisi latou te fai paaga e galulue faatasi e saili auala e faaleleia ai tulaga tau tupe maua mo le faatinoina o nisi o fuafuaga e pei o le faaleleia o malae taalo autu.
O le maualuga na iai le taumafaiga a le Manu Samoa i le Ipu o le lalolagi faapea le ‘au a tamaitai le Manu Sina ua faaalia e le pulega o le lakapi a Samoa o nisi ia o vaega tāua tele i tapenaga o loo faia nei, aemaise lava i le aulia o le selau tausaga, ma le silasila mamao i le lumanai o le isi selau tausaga.
