O lea ua savali nei i le tolu masina o le faigapaaga a le auaunaga a le South Seas Healthcare ma komiuniti a Samoa, ae faapitoa lava i tagata matutua.
O le mafutaga ua faaigoaina o le Fetu o le Pasefika.
Ua tatala le avanoa i soo se tamā ma soo se tina e fia auai, e talatalanoa ma faasoa i mea sa tutupu i le latou vaitaimi a o soifua a’e i totonu o Samoa.
Ae o se avanoa lelei foi e mafai ai ona fai ni taaloga e taaalo faatasi ai ma fefaasoaa’i le iloa i le lalagaina o meataulima e pei ona limalima lelei ai tina i totonu o aiga.
Na amata lenei polokalame na o le to’avalu nai tamā ma tina matutua sa auai ae o lea ua faasolosolo lava ina silia i le 24 tuaa sinasina ua mafai ona mafuta faatasi.
O le faatofāla’iga na a’e i le pulega a le South Seas Healthcare mo nai tamā ma tina matutua i le vevela ai o le tau mālūlū ae se’i fai se auala ia aua ai ne’i nonofo umi i totonu o fale ae fai ma feoa’i solo ma asiasi solo e maua ai le isi faasiliga malosi mo latou.
Ae lē gata i lea o le to’atele o tagata matutua o loo auai i le auaunaga o le falema’i a le South Seas Healthcare, ma o lea ua tatala ai le avanoa mo i latou uma i totonu o le mafutaga e siaki ma vaai fua uma ai le foma’i pe a iai ni gasegase e maua ai.
Ua iai nisi o auaunaga o lea ua mafai ona faasoa iai le South Seas Healthcare mo nai tagata matutua e pei o le faatinoina o le penefiti o tagata matutua i le tau mālūlū, o le sailiga o fale auā nai aiga o lea faato’ā taunuu mai i Samoa aemaise o penefiti mo nai tamaiti faato’ā taunuu mai i Samoa.
Ua faailoa le agaga fiafia o nai tuaa matutua i lenei mafutaga ona ua tele se sao mo latou ma aiga, ua lē gata i le maua ai o le mafutaga fiafia ma nisi o tagata matutua ae ua iloa ai le tele o faamanuiaga e tatau ona maua e aiga aemaise lava i latou matutua.
O Aso Lulu o vaiaso ta’itasi o loo faatino ai lenei mafutaga i totonu o le South Seas Healthcare, ma e iai lava le taavale e piki ai i latou e lē maua ni auala e malaga mai ai i le nofoaga o loo faatino ai le mafutaga i vaiaso ta’itasi.
O le fetalaiga ia Seumanu Mikaele Teofilo o loo ta’ita’ia lenei mafutaga.
