Ua limasefulu nofoaga i Samoa o loo faafailele ai nei ma tausi ai i’a o le tilapia, o se atinae ua molimauina le fiafia o nisi i lo tatou atunuu e atiae.

Sa fafaga lava i’a tilapia i meaai e pei o penu, ae o le tausaga na tea nei o le taimi muamua lea na aumai ai mai fafo taga meaai ma amata ai loa ona fafaga tilapia i meaai ua gaosi.

O se tasi lea o i’a-vai e lelei tetele lona aano i le tausiga o le tino mo le soifua maloloina, ma o se taumafa foi o loo autu lona atinaeina i le faateleina o taumafa, mo taimi e tulai mai ai ni faaletonu i le faaitiitia o meaai e maua.

O le Minisita lagolago o le Matagaluega o le Soifua Maloloina le afioga Fuimaono Maiva Tito Asafo na saunoa i le tufatufaina o le uta lona lua o taga meaai mo atinae tilapia.

“O le container muamua sa auina mai lea ma tufatufaina i le tausaga talu ia Fepuari 2023 e tusa ma le 350 taga i le mamafa e 25kg sa auina mai mai.

“O le container lona 2 lenei o le aofaiga o taga meaai a tilapia e; 655 taga, 25kg i le taga e tasi.

“O lenei taumafaiga ina ia mafai ona siitia tatou atinae tilapia i totonu o Samoa mo le fofoga taumafa aemaise ia ausia tulaga e mafai ona gafataulimaina ai maketi e lē gata i totonu o Samoa ae faapea mo le auina atu i fafo.

“O le taimi nei ua sili atu ma le 50 faifaatoaga tilapia i totonu o Samoa ma o loo faailoa mai lava le fiafia o tatou tagata e atinae lenei matai’ai.

“O lenei taumafaiga ua mafai ona faatupeina mai lalo o le Poloketi a le PIRAS – Pacific Island Rural and Agriculture Stimulus Facility na amata mai ia Setema 2021, i lona aofaiga e USD $35,000 e tusa ma le SAT$92,000.

“O se taumafaiga faaitulagi nei e tali atu ai i aafiaga o tatou tagata mai le faama’i o le Koviti-19.

“O loo faatupeina mai lalo o le IFAD (International Fund for Agricultural Department) a le malo o Ausetalia.

“E momoli atu ai le faafetai tele i le malo o Ausetalia e tauala i le IFAD mo le tatou Poloketi lenei o le PIRAS e tusa ai o lenei fesoasoani mo le tatou Malo aemaise mo tatou aufaifaatoaga Tilapia.

“E tatalo atu ai i le tatou Asosi o le Aufaifaatoaga Tilapia (SAFA) ina ia toe faamautu ma faamalosi le unaia o le tatou Asosi e mafai ai ona oo atu i se isi tulaga ia lenei atinae o le tilapia i Samoa”…o le saunoaga a le Minisita Lagolago o le Matagaluega o Faatoaga ma Faigafaiva.