Ua faaulu nei i le tulafono se tagi faatasi faasaga i le kamupani telefoni a le Optus ma le mataupu na aafia ai ana paaga i le tausaga talu ai, le data breach na aafia ai le toatele. 

O le ofisa loia Slater and Gordon o loo tulai mo le silia ma le 100 afe o sui ua auai i lea tagi.

O le mau a loia e pei ona faailoa i le 9News ua le mafai e le Optus ona faatino lona tiute o le puipui o ana paaga ma ua solia foi tulaga faalilolilo, fesootaiga ma le consumer law.

Fai mai le ofisa loia o le ituaiga faaletonu na aafia ai paaga a le Optus ua tuuina ai i latou i se tulaga ua lamatia ai foi i nisi ituaiga faiga taufaavalea atoa ai ma le gaoia o faamaumauga patino i o latou tagata.

O le masina o Mati o le tausaga nei na faailoa ai e le Ofisa Sili o le Optus, Kelly Bayer Rosmarin e leai se customer poo se paaga a le kamupani na aafia i le lusi o se tupe pe aafia foi i se soligatulafono ona o le faaaoga sese o faamatalaga.