O le failautusi o le pati faaupufai o le Faatuatua i le Atua Samoa ua Tasi, le tofa Vaaaoao Alofipo ua ia faaulu i le faamasinoga faaitumalo ni moliaga o faiga faaalatua solitulafono ua ta’ua i le gagana Peretania o le bribery, faasaga i le sui faipule o Faleata 3 le tofa Lealailepule Rimoni Aiafi.

Na faailoa lea tagi e le loia o loo tulai mo le faipule o Vaimauga 3 le afioga Lautimuia Afoa Uelese Vaai, i le tagi tau palota ua tuuaia ai lea sui faipule i faiga faaalatua ma le faamoemoe e faatosina ai tagata palota, lea o le a tagofia ma suesueina e le faamasinoga i le lua vaiaso o lumanai nei.

Ua faailoa e le alii loia le susuga Lagaaia Fetu Iupati Lagaaia, o le mataupu ua i luma o le faamasinoga faaitumalo o le a valaau mo le taimi muamua i le aso 18 o le masina nei, ma o se private prosecution poo ni moliaga solitulafono o le a finauina e se loia tutoatasi.

E ese mai lea mataupu, o le tagi tau palota o loo molia ai le sui faipule o Faleata 3 i lona ave o ni tupe tai selau tala i ni tagata palota se toalua o le itumalo o Vaimauga 3 ma le faamoemoe e faatosina ai le filifiliga a ia tagata palota.

O le toe valaauina i le Aso Gafua o le mataupu lenei, na tuuina atu ai e le loia a Lautimuia Uelese Vaai se tusi taofi o se poloaiga a le faamasinoga faaitumalo poo se Departure Prohibition Order e ta’ua faapuupuu o le DPO, ua taofia ai ona tuua e le sui faipule le atunuu.

E pei ona silafia o le fofogaina o le tagi lenei i le vaiaso ua mavae na faailoa ai e le loia o loo finauina le tagi tau palota le afioga Fuimaono Sefo Ainuu, e manaomia se poloaiga a le faamasinoga e mafai ai ona malaga ese ma le atunuu le tofa Lealailepule, ae e mafai ona faatino mai fafo i auala o fesootaiga faaonapo nei lana molimau.

Peitai sa faailoa e le loia a le itu o loo faasaga iai le tagi tau palota le teena o lea talosaga.

Ua iai le faamoemoe o le a silasila le faamasinoga maualuga i le poloaiga ua taofia ai ona malaga ese le sui faipule ma le atunuu, a o lei valaauina mau o le talosaga autu.

Ae i taualumaga o lenei mataupu i le amataga o lenei vaiaso, e lei tuuina atu e le loia a le itu tagi se talosaga mo se poloaiga i le tulaga i le faalavelaveina o nisi o a latou molimau e pei ona faailoa e le alii loia le afioga Fuimaono Sefo i le faamasinoga i le vaiaso na tea nei lea tulaga, ma faatonuina ai e tuuina atu se talosaga aloaia.