Ua faailoa e leoleo Ausetalia o kegi faavaomalo e aumaia faasolitulafono fualaau faasāina i le atunuu o loo faaauau pea ona vaaia le faaaogā o container mālūlū e nanā ane ai le cocaine ma aumai ai i totonu o Sini.

O le asō ua faailoa ai e le Australian Federal Police ma le Australian Border Force faamatalaga e faatatau i le maua o le 41 kilo o le cocaine e nanā mai i containers e lua i Port Botany i Sini i le masina na te’a nei.

O le container muamua e aumai mai Chile sa maua ai i totonu le 20 piliki o loo teuina mai ai le ta’i 1 kilo o le fualaau faasāina ma sa maua i le aso 23 o Ianuari.

O le isi aso na sosoo ai na maua ai foi le 21 piliki o loo teu mai ai foi le cocaine i le isi container lona 2 e sau mai Belgium.

Fai mai le AFP o le maua o ia fualaau faasāina ua iloa ai ua aga’i i latou o loo faia lea gaioiga e faaaogā ituaiga metotia ia e nanā mai ai fualaau faasāina.

Fai mai ina ua taunuu mai i Port Sydney sa taumafai ai le ausolitulafono e aveese mai fualaau faasāina ia e ala i le taumafai e osofa’i nofoaga na iai containers ma ua maitauina le faateteleina o ia ituaiga togafiti ma ta’ua o loo iai ni masini ua faaaogā e i latou ia e iloa ai containers o loo iai totonu fualaau faasāina.

E to’afā alii ua ioe i moliaga i nei solitulafono ma o le masina nei e lauina ai o latou i’uga.

Puna o Faamatalaga: https://www.google.com/amp/s/amp.9news.com.au/article/9df076fb-ceb2-40ae-a82f-ba0175598547