O se faigamalaga a le Qantas mai Townsville i Brisbane na faaui ane e tulaueleele i le malaevaalele i Rockhampton ona o se faaletonu na aafia ai le vaa.
O le faigamalaga na alu ese mai Townsville i le 8.50 i le taeao analeila, peitai a o alu le faigamalaga na maua ai e le pailate se faailo o se vaega o loo faaletonu o le vaalele.
Na tuutuu ane ai i lalo e le pailate le vaalelee pei ona manaomia ona fai i tulaga faaletonu faapea pei ona faailoa i le lipoti ma talosagaina ai loa le faatulaeleele i se malaevaalele e latalata ane.
O se sooupu a le Qantas na ia faamaonia i le 9News o se faaletonu tau pressure i le vaalele na afua ai ma sa tulaueleele saogalemu le vaa i Rockhampton.
Ua faatulaga ai isi faigamalaga mo le pasese ina ia taunuu i Brisbane e pei ona fuafua e faimalaga iai.
E faafetaia e le kamupani vaalele le onosai o le pasese ma le malamalama foi i tulaga o faaletonu e tulai mai i taimi o faigamalaga.
Puna o Faamatalaga: https://www.9news.com.au/national/qantas-flight-to-brisbane-diverts-to-rockhampton-airport-following-depressurisation-issue/a97692db-229d-4d27-9439-240c5070557b
