O le masina o Iulai o le tausaga fou 2025 ua toe faatulaga e le faamasinoga e su’esu’e ai moliaga o loo tetee iai se matai matua 70 ma ona tupu tausaga o le soifua, o ia lea o Aitauia Ioasa Lemau o Lefagaoalii.
O loo teena e Aitaua moliaga o le tau faamata’u e faaoo le oti ma le umia o se a’upega mata’utia.
O le isi ona moliaga o le ave faamalosi o se tagata ua ia ioeina faatasi ma isi matai ma taulele’a o Lefagaoalii o le a lau so latou faasalaga i le masina o Fepuari o le tausaga fou 2025.
O Aitauaia o loo tatala i tua faatasi ai ma se isi matai ae o le isi to’asefulu e aofia ai foi ni matai ma ni taulele’a o lea lava afio’aga o loo nofo taofia e faatali le lauina o le faasalaga i le tausaga fou.
I le tasi o mataupu i le Faamasinoga Maualuga lava, o lea ua faatulaga o Me o le tausaga fou e su’esu’e ai moliaga o Pokati Tuu poo Pokati Faatauī 58 tausaga le matua o Fasitoo uta.
Ua mae’a tuuina atu lana tali tetee i moliaga e lua o le fasioti tagata faamoemoeina ma isi moliaga e pei o le umia o se a’upega mata’utia o se laau malosi, umia o ututau, ma moliaga o le faaoo manu’a, faaoolima ma le umia o se laau malosi e le’i laiseneina.
O loo molia Pokati ona o le maliu o se alii leoleo ma se tamā mai le nuu o Nofoalii, ma o loo tatala i tua i ni aiaiga e faatali ai le aso o lona faamasinoga.
