E manatu nisi ua foliga ua toe ta’uleagaina lipoti o le autaalo a Ausetalia i le Olimipeka ona o gaioiga a se tasi alii taalo o Tom Craig na pu’eina ma taofia e leoleo Paris ina ua maua o taumafai e faatau le fualaau faasāina o le cocaine.
O loo tulaga tolu nei Ausetalia i le tuufaatasiga o pine ua maua a atunuu i ia taaloga ma o le tausaga aupito i maualuga ai lenei le taumafai a le autaaalo mai Ausetalia ma o se tulaga lelei tele.
Ua saunoa le pule o le aumalaga a Ausetalia i le Olimipeka, Anna Meares ua mautinoa e na o le alii o Tom Craig na aofia i lea mataupu, e leai se isi o le au hockey a alii le Kookaburras o aofia ai.
Ua toe tatala i tua le alii taalo ma ua mae’a faatoese foi i le sasi o lana faai’uga, e lei iai ni moliaga ma se faamaoniga o se solitulafono se’i vaganā se lapata’iga na tuuina iai e leoleo peitai fai mai le pulega o le ‘au e iai tulaga e tatau ona faatino iai e tusa ma maliega i tulaga faapea ae tumau pea le lagolago pe a manaomia.
Ua aveesea uma isi faamanuiaga sa agavaa iai tau Olimipeka ma ua agai ese foi mai le Olympic village ma e lē auai i le sauniga e tapunia aloa’ia ai taaloga.
Na faia se feiloa’iga a le alii taalo ma tusitala ma ia faatoese ai i le mataupu ua aafia ai ma ua salamō i le faai’uga sa ia faia.
Puna o Faamatalaga: https://7news.com.au/sport/olympics/tom-craig-arrest-details-emerge-as-australian-olympic-officials-take-action-c-15629278
