O le faama’ite o ni atinae ma ni galuega lelei e manuia ai nuu ma itumalo, o se manulauti tāua lea o loo faamuamua e le Malo i ana faiga faavae.

Ua molimauina lea tulaga i le mafutaga muamua ua faatasia ai autalavou a ekalesia eseese o le itumalo faapalota o Palauli tasi lea faatoa mae’a lea mafutaga sa tumutumu ai le maota poo le hall a le ekalesia faapotopotoga kerisiano i Foailuga i Savaii.

O le tamaitai faipule o le itumalo le afioga i le Minisita o le Matagaluega o Tina ma Tamaitai Atinae o Afioaga ma Agafesootai na saunoa e tatala lea mafutaga sa auai autalavou a ekaleasia mai afioaga e 6 o le itumalo e aofia ai Taga, Siutu, Sala’ilua, Satuiatua, Foailuga ma Foailalo.

Faaalia e le sui faipule o Palauli Tasi, o Aokuso na faatalanoa ai e faafeagaiga o ekalesia a le itumalo le faia o se mafutaga a autalavou, i le autu ia maua se avanoa e mafuta faatasi ai a fetufaa’i i mataupu o le ola faaleagaga ma le soifua faaletino.

O Tupulaga Talavou ia ola faapaiaina o le sini ma le autu lea o le mafutaga ma ua faailoa e le faipule afioga Mulipola Anarosa Ale-Molioo, o le naunautaiga ia faaauau lea faamoemoe lelei o loo tausolomua ai faafeagaiga, o sui o nuu ma alii ma faipule.

O le mae’a o le mafutaga na faataoto ai nisi o fuafuaga o le atinae o le itumalo mo masina o lumanai ai nei.